جۋرناليستەردىڭ كاسىبي مەرەكەسى قارساڭىندا ءبىزدىڭ باسىلىم «استانا» تەلەارناسىنىڭ باس ديرەكتورى ق.جۇماعاليمەن اڭگىمەلەسكەن ەدى. ارنا باسشىلىعىنىڭ ەفيرلىك سەتكانى جۇيەلى جۇرگىزۋ جانە مەملەكەتتىك-اقپاراتتىق ساياساتتى ءتيىمدى پايدالانۋ ناتيجەسىندە مەديا رەسۋرس ەلدەگى جەتەكشى-تانىمال تەلەارنالاردىڭ قاتارىنا ەندى. «استانا تۆ» مامىر ايىندا توپ 3 تىككە ەنىپ، قارقىندى دامىپ كەلە جاتقان ارنالاردىڭ كوشىن باستاپ تۇر.
– قىسقا مەرزىمدە ارنانىڭ جىلدام وسۋىنە نە اسەر ەتتى جانە جوعارى ناتيجەلى كورسەتكىشتەرگە قالاي قول جەتكىزىلدى؟
– كەشە عانا پرەزيدەنت قاسىم-جومارت كەمەل ۇلى توقايەۆ «انا ءتىلى» گازەتىنە بەرگەن سۇقباتىندا مەملەكەتتىك ساياساتتىڭ ۇستىنى بولاتىن اقپاراتتىق يدەولوگيانىڭ تىم نازىك، تىم وزەكتى ەكەنىن ورايلى جەتكىزدى. تەليەۆيزيالىق جانە راديو حابارلارىنىڭ ساپاسىن ارتتىرۋ، كورشى ەلدىڭ تەلەونىمدەرىنىڭ كوشىرمەسىن ەمەس، قوعامدىق ويدىڭ ۇيىتقىسى بولاتىن دۇنيەلەردى ەفيردەن بەرۋ. ۇلتتىق يدەولوگياعا قىزمەت ەتەتىن قۇندى دۇنيەلەردى، ءتول ونىمدەرىمىزدى مولايتۋ كەرەك دەگەن پىكىردىڭ ىشىندە استارلى ءھام تەرەڭ وي جاتقانىن سۇقباتتى وقىعان كەز-كەلگەن وقىرمان ۇقتى دەپ ويلايمىن. وسى تۇرعىدا، مەديا سالاسىنداعى جاۋاپتى قىزمەتتىڭ باسى-قاسىندا جۇرگەن ارىپتەستەرىمە زور جاۋاپكەرشىلىك جۇكتەلەتىنى انىق.
ورايى كەلگەندە ايتا كەتۋ كەرەك، اstana TV – “نۇر وتان” پارتياسىنىڭ اقپاراتتىق حولدينگىنە كىرەتىن تەلەارنا بولعاندىقتان، ءبىزدىڭ الدىمىزدا مەملەكەتتىك يدەولوگيالىق ساياساتتى كورەرمەنگە وڭتايلى جەتكىزۋ سىندى بيىك ماقسات بار. سونىمەن قاتار، پارتيانىڭ ىلكىمدى ىستەرى مەن ىرگەلى باستامالارىن كورەرمەنگە جەتكىزۋ باستى نازاردا.
2019 جىلدىڭ قازان ايىندا ارنا باسشىلىعىنا كەلگەننەن كەيىنگى العاشقى جۇمىسىمىز ەفيردەگى دۇنيەلەر، ونداعى باعدارلامالىق ساياساتقا تالداۋ جاساۋمەن باستالدى. جاڭالىقتار قىزمەتىنىڭ الەۋەتى، ايماقتارداعى مەنشىكتى تىلشىلەر قوسىنى مەن تۇراقتى كونتەنتىن ەسكەرسەك، ارنانىڭ وسى ۋاقىتقا دەيىن توپ - 5 تىكتە بولۋعا مۇمكىندىگى مول ەدى. الايدا، سول ۋاقىتتارداعى ەفيرلىك جانە وندىرىستىك قىزمەتتىڭ توقىراۋى سالدارىنان، اۋديتوريالىق كورسەتكىشتەر تومەندەپ، ارنا ۇسىنعان جوبالاردىڭ تانىمالدىلىعى جوعالا باستادى. ونىڭ ۇستىنە، باسەكەلەستىك ورتا كۇشەيىپ، باسقا تەلەارنالاردىڭ ەفيرىندە جاڭا دا ساپالى، قىزىقتى مازمۇنداعى ونىمدەر پايدا بولدى.
ءبىزدىڭ ارنانىڭ الدىندا ۇلكەن ماقسات تۇردى. ول – تومەنگە قۇلديلاپ كەتكەن رەيتينگتى از ۋاقىتتا قايتا قالپىنا كەلتىرۋ. ال تومەن رەيتينگ-ارنانىڭ تابىسىنىڭ ازايۋىنا الىپ كەلەتىنى بەلگىلى. وسى ماسەلەنى شەشۋ ءۇشىن جاڭا مەحانيزمدى ىسكە قوستىق. الدىمەن كورەرمەن اۋديتورياسىن زەرتتەپ، وسى باعىتتا تەرەڭ تالداۋ جۇرگىزدىك. ارناداعى مازمۇنى ەسكىرگەن ءبىرقاتار جوبالاردى ەفيردەن الىپ تاستادىق. جاڭالىقتاردىڭ فورماتىن وزگەرتتىك.
كۇندەلىكتى كورسەتىلەتىن اقپاراتتىق باعدارلامالاردى دا قايتا جۇيەلەدىك. كوزى قاراقتى كورەرمەن ءۇشىن ايتا كەتكەن ءجون. قازاق جانە ورىس تىلدەرىندەگى جاڭالىقتار نۇسقاسى «Astanatimes» اتتى ءبىرىڭعاي جاڭالىقتار جوباسىنا بىرىكتىرىلىپ، ءار جاڭالىق بىرەگەي جانە باسقا تىلدە قايتالانباي بەرىلەتىن بولدى. مۇنداي شەشىم قابىلداۋعا، قازاق جانە ورىس تىلدەرىن جاقسى بىلەتىن ماقساتتى اۋديتوريامىزدىڭ ەرەكشەلىكتەرىن ەسكەرە وتىرىپ قول جەتكىزدىك. قازاق، ورىس تىلدەرىندەگى جاڭالىقتاردىڭ ەكى تىلدە قايتالانىپ بەرىلۋى كورەرمەنىن جالىقتىراتىن ەسكى تەحنولوگيا ەكەنىن دەر كەزىندە انىقتادىق.
جىل باسىندا مەديا سالاسىنىڭ جاڭا بۋىنىن تاربيەلەۋ ماقساتىندا جاس جۋرناليستەر اراسىندا «Astanatimes» ءۇشىن جاڭا كوشباسشىلاردىڭ اۋقىمدى بايقاۋىن (كاستينگىن) وتكىزدىك. ايتا كەتۋ كەرەك، وسى باستامامىز ارقىلى قاراپايىم ازاماتتاردىڭ باعدارلاما تىزگىنشىسى بولا الاتىنىنا كوز جەتكىزە وتىرىپ، سەنىمدىلىك پەن ادالدىق ءپرينسيپىن ەنگىزدىك. اۋديوۆيزۋالدى سايكەستەندىرۋ جاڭارتىلدى: لوگوتيپ پەن گرافيكالىق ارلەۋ وزگەرتىلدى. ەفيرگە زاماناۋي گرافيكالىق ترەندتەر شىعا باستادى. سونىمەن قاتار، ارنا جاڭا ستيلدە ءۇن قاتتى. وسى اتقارىلعان قىرۋار جۇمىستار ارقىلى كورەرمەن بويىندا ءبىزدىڭ ارنامىزعا دەگەن سەنىمدى كوزقاراس قالىپتاستىردىق.
باعدارلاما اراسىندا كورسەتىلەتىن روليكتەر توپتاماسىنىڭ بەرىلۋ تاسىلدەرى وزگەرتىلدى. مەملەكەتتىك ماڭىزى بار اتاۋلى مەرەكەلىك كۇندەرگە سايكەس ارنايى گرافيكالىق ۇتىمدى تاسىلدەرمەن اقپارات بەرىلىپ وتىرادى. تەلەارنا ميسسياسى كورەرمەننىڭ كوڭىلىن كوتەرۋ عانا ەمەس، تاريحي وقيعالار مەن كورنەكتى تۇلعالار تۋرالى اقپارات بەرۋ ەكەنى داۋسىز.
وسى تۇرعىدا قازاقتىڭ ۇلى اقىنى اباي قۇنانبايەۆقا ارنالعان بەينەروليكتەر سيكلىن اتاپ وتكىم كەلەدى. وتكەن جىلى ارنا كەلبەتى رەتىندە اباي اتامىزدىڭ «قارا سوزدەرىنەن» جاسالعان روليكتەر توپتاماسىن ەفيردەن بەردىك. ابايدىڭ 175 جىلدىعىنا وراي 14 بەينەروليك تۇسىرىلگەن ەدى.
قولعا العان بارلىق جوبالارىمىز بەن باستامالارىمىز «حالىقتىق ارنا» قاعيداسىنا ساي جاسالدى. كورەرمەندەرگە قاراپايىم تۇردە بەرىلەتىن تۇششىمدى جوبالار مەن فيلمدەر شىعارۋ، كەرەك بولعان جاعدايدا تەلەونىمدەردى ساتىپ الۋ جۇمىستارىن جالعاستىرا بەرەتىن بولامىز. كورەرمەنگە جاقىن بولۋ ءبىزدىڭ مۇراتىمىز. وسى تۇرعىدا ءبىز ءۇشىن ارنانىڭ كەي جوبالارىنا الەۋمەتتىك كومپونەنتتى ەنگىزۋ وزەكتى بولىپ قالا بەرمەك. تۇيىندەپ ايتساق، بۇقارانىڭ بازىناسىن بوياماسىز كورسەتەتىن ارناعا اينالۋ ءۇشىن بارىمىزدى سالامىز.
وتكەن جىلدىڭ قاراشا ايىنان جاڭالىقتار قىزمەتىنە «ستۋدياعا قوڭىراۋ شال» اتتى جاڭا ايدار ەنگىزىلدى. كەز كەلگەن كورەرمەن جاڭالىقتار ستۋدياسىنا قوڭىراۋ شالىپ، ءوز ماسەلەلەرى تۋرالى ايتىپ، ءتۇرلى اقپاراتپەن بولىسە الادى. جاڭالىقتار قىزمەتىندەگى شىعارماشىلىق توبىمىز كەز كەلگەن قوڭىراۋعا دەر كەزىندە جاۋاپ بەرىپ، ماسەلەنى ءتيىستى قۇرىلىمدارعا جەتكىزىپ وتىرادى.
بۇگىنگى تاڭدا رەداكسيامىزعا 3500 دەن استام قوڭىراۋ ءتۇستى. ءبىز تۇرعىنداردان تۇسكەن 185 ماسەلەنى قازاق، ورىس تىلدەرىندە تىكەلەي ەفيردە كورسەتىپ، ءتيىستى جەرلەرگە جەتكىزدىك. جاقىن كۇندەرى 150 دەن استام ماسەلە شەشىلدى. قالعان سۇراقتاردىڭ ءتۇيىنى جاقىن كۇندەرى شەشىلەدى. جالاقىنىڭ كەشىكتىرىلۋى، جول جوندەۋ، تۇرعىن ۇي-كوممۋنالدىق شارۋاشىلىق ماسەلەلەرى ءجيى قويىلاتىن سۇراقتار قاتارىندا. كەي شەنەۋنىكتەر مەن باسقا دا جاۋاپتى مەكەمە قىزمەتكەرلەرىنىڭ قانداي دا ءبىر قارسىلىعىنا قاراماستان، ءبىز بارلىق ماسەلەلەردى تولىق شەشۋگە تىرىسامىز. ءبىزدىڭ ارنانى بەلگىلى ءبىر دارەجەدە تەليەۆيزيالىق قوعامدىق قابىلداۋ دەپ اتاۋعا بولادى.
الەۋمەتتىك سيپاتى باسىم جوبالارىمىزدىڭ ءبىرى – «ايالى الاقان» دەپ اتالادى. قايىرىمدىلىق ماقساتتا اشىلعان تەليەۆيزيالىق جوبادا – قيىن جاعدايعا تاپ بولعان ادامدارعا كومەك بەرىلىپ، ناقتى قولداۋ كورسەتىلەدى. جوبا ءتۇرلى ماسەلەلەردى شەشۋگە باعىتتالعان. جوبا اۆتورى بيبىگۇل داۋلەتبەك قىزى ءتۇسىرىلىم بارىسىندا كەيىپكەردىڭ تۇرمىس تىرشىلىگىن، ءتۇرلى اۋىرتپاشىلىقتار مەن كۇرەستەگى جانقيارلىق ەرلىگىن كورسەتەدى. اۋىر ناۋقاستار، كوپ بالالى وتباسى، تۇرمىسى تومەن، جەتىم بالالار ت.س. الەۋمەتتىك مۇمكىندىگى شەكتەۋلى جاندارعا قول ۇشىن بەرەمىز. جوبانى ءتۇسىرۋ كەزىندە ءوتىنىش بىلدىرۋشىلەردىڭ بارلىعىنا دەرلىك كومەك كورسەتىلدى.
مامىردىڭ ورتاسىنان باستاپ، ارنانىڭ ەفيرلىك ۋاقىتى تىكەلەي ەفيردەن بەرىلەتىن «ايتارىم بار» اتتى جاڭا الەۋمەتتىك توك-شوۋمەن تولىقتىرىلدى. باعدارلاماعا كەيىپكەردىڭ ماسەلەلەرىن شەشۋ ماقساتىندا ناقتى سالانىڭ وكىلدەرى مەن ءتيىستى ماماندار شاقىرىلادى. باستىسى، پروبلەماسىن شەشۋدى قالايتىن كەز-كەلگەن تۇرعىن جوباعا قاتىسا الادى. جوبادا وزەكتى تاقىرىپتار مۇقيات زەرتتەلىپ، تالقىلانادى. باعدارلاما بارلىق سانيتارلىق-ەپيدەميولوگيالىق نورمالاردى ساقتاي وتىرىپ، قاتىسۋشىلار سانىن شەكتەۋ، بەينە بايلانىستاردى قوسۋ سىندى تەحنولوگيالىق مۇمكىندىكتەردى پايدالانۋ ارقىلى تىكەلەي ەفيرگە شىعادى.
– قوعام مەن مەملەكەتتىڭ نازارى كورونوۆيرۋس پاندەمياسىنا جانە ونىڭ ءورشىپ، تارالۋىنان تۋىنداعان قيىندىقتارعا باعىتتالىپ وتىر. ءسىز باسقاراتىن ارنا قىزمەتىنە بۇل جاعداي قانشالىقتى اسەر ەتتى؟
– پاندەميا ادامزات بالاسىنىڭ كۇندەلىكتى تىرشىلىگىنىڭ بارلىق سالالارىنا ايتارلىقتاي وزگەرىستەر ەنگىزدى. ارينە، سايكەسىنشە مەديا قىزمەت، تەلەارنا سالاسى دا بۇدان تىس قالمادى. قىسقاسى، تەلەارنا قىزمەتى دە قانداي دا ءبىر وزگەرىستەرگە تاپ بولۋدا. قازاقستاندىق مەديا-نارىقتاعى بارلىق دەرلىك جارنامالىق كومپانيالاردىڭ مازمۇنى مەن قىزمەتى توقتاتىلدى. سايكەسىنشە ىشكى جارناما بيۋدجەتى دە ەداۋىر قىسقاردى.
پاندەميالىق جاعداي ءبىزدىڭ بىرنەشە جوبالارىمىزدى جاعداي ءبىر قالىپقا تۇسكەنگە دەيىن توقتاتا تۇرۋعا ءماجبۇر ەتتى. ال، باسقا ەلدەرگە ەنگىزىلگەن كارانتيندىك شارالار ارنامىزداعى كەي جوبالاردىڭ ءتۇسىرىلىم جۇمىستارىنا تىكەلەي اسەر ەتتى دەۋگە بولادى. مىسالى، ءبىزدىڭ ارانامىزدان ەفيرگە شىعاتىن «قارا نيەت» اتتى تۇرىك سەريالىنىڭ ءتۇسىرىلىم جۇمىستارى اياقتالماي قالدى. وسى رەتتە كورەرمەندەرىمىزدىڭ الەۋمەتتىك جەلىلەر مەن رەداكسيامىزعا قوڭىراۋ شالۋ ارقىلى سەريالدى كورسەتۋدى سۇراپ، حابارلامالار قالدىرعانىن ايتا كەتكەن ءجون.
توتەنشە جاعداي رەجيمىنىڭ العاشقى كۇندەرىنەن باستاپ، ءبىزدىڭ ارنا قاشىقتىقتان جۇمىس تارتىبىنە اۋىستى. كىرىستىڭ ازايۋىنا قاراماستان، ءبىز مەكەمەنىڭ شتاتتىق سانىن ساقتاپ قالدىق. ەڭ باستىسى، بارلىق قىزمەتكەرلەردىڭ جالاقىلارىن تولىعىمەن ساقتاۋعا تىرىستىق. توتەنشە جاعداي مەن كارانتيندىك شارالارعا قاراماستان، ءساۋىر-مامىر ايلارى ارالىعىندا 50 – دەن استام ارنايى رەپورتاجدار مەن «ەلوردا live» تىڭ 25 ستۋديالىق شىعارىلىمىن تۇسىردىك. پاندەميامەن كۇرەستەگى ەلوردالىق جەدەل شتاب جۇمىسىنىڭ قىر-سىرىنا ءۇڭىلىپ، جان-جاقتى اقپارات بەرىلدى. ءبىزدىڭ تىلشىلەر جاعدايدى ءتۇرلى راكۋرستارمەن بەردى. بلوك بەكەتتەردە بولدى. قۇقىق بۇزۋشىلاردى انىقتاۋعا بايلانىستى ۇيىمداستىرىلعان رەيدتەرگە قاتىستى، اۋرۋحانالار مەن ەمحانالار جۇمىسىنىڭ قارقىندى قۇرىلىسىن كورسەتتى. باعا نارىعىنداعى احۋالدار مەن باسقا دا كارانتيندىك شارالارعا قاتىستى جۋرناليستىك زەرتتەۋلەر جاسادى.
ءبىزدىڭ جۋرناليستەر ءوز دەنساۋلىعى، جاقىندارىنىڭ دەنساۋلىعىنا ءقاۋىپ ءتوندىرىپ، كارانتين رەجيمىنە قاراماستان جۇمىستارىن جالعاستىرۋدا. ۆيرۋسپەن كۇرەستە الدىڭعى شەپتە بولعان بارلىق ب ا ق قىزمەتكەرلەرىنىڭ ادال جۇمىسىن ەرەكشە اتاپ وتكىم كەلەدى. ءبىزدىڭ كاسىبىمىزدىڭ باستى ميسسياسى - جەدەل جانە سەنىمدى اقپاراتپەن قامتاماسىز ەتۋ بولاتىن. بۇل ميسسيامىزدىڭ ومىرشەڭ ەكەنىنە تاعى ءبىر مارتە كوز جەتكىزدىك.
– مەديا يندۋستريا نارىعىن زەرتتەپ جۇرگەن كەي ساراپشىلار توتەشە جاعدايعا بايلانىستى ەنگىزىلگەن شەكتەۋلەر كەزىندە تەلەديدار كورەتىندەر سانىنىڭ ارتقاندىعىن العا تارتىپ وتىر. كورەرمەندەردىڭ قالاۋى وزگەردى مە؟ الدە، تەليەۆيزيانى باسقا دا اقپارات كوزدەرىنەن ارتىق كورەتىن ءداستۇرلى اۋديتوريا مەن كارانتينگە بايلانىستى تەلەديدار كورۋگە قايتا ورالعان اۋديتوريا اراسىندا قانداي دا ءبىر بايلانىس بار ما؟
– جالپى العاندا، پاندەمياعا دەيىنگى جىلداردا تەلەديدار كورەتىن اۋديتوريانىڭ ايتارلىقتاي ازايىپ بارا جاتقانى بايقالدى. بۇل تەندەنسيا الەمنىڭ كوپتەگەن ەلدەرىنىڭ مەديا نارىعىنا ءتان ورىن الدى دەسەم قاتەلەسپەيمىن. ال، كارانتين ۋاقىتىندا تەلەديدار كورەتىندەر قاتارى 20 پروسەنتكە ارتتى دەۋگە بولادى. بۇل كورسەتكىش ارقىلى حالىقتىڭ ءداستۇرلى ب ا ق قا دەگەن سەنىمى زور ەكەنىن بايقادىق. وسىعان بايلانىستى جاڭالىقتار مەن باسقا دا اقپاراتتىق باعدارلامالاردى قاراۋ كولەمىنىڭ ارتۋى زاڭدى بولاتىن.
بۇگىندە كارانتين كەزىندە كورەرمەن قاۋىمنىڭ نازارىنان تىس قالماعان جانردىڭ ءبىرى-ويىن-ساۋىقتىق باعدارلامالار. سوسىن وتاندىق جانە شەتەلدىك تەلەحيكايالار سۇرانىستا بولدى.
ال "استانا تۆ"ارناسىنىڭ اۋديتورياسىنا كەلەتىن بولساق،جىل باسىنان بەرى قارالىم كورسەتكىشى ەداۋىر ارتقانى بايقالدى. وتكەن مامىر ايىندا جانە وسى ماۋسىمنىڭ باسىندا ارنانىڭ قارالىمى 90 پروسەنتكە جەتتى. بۇل - "استانا" تەلەارناسى قىزمەتكەرلەرىنىڭ جۇيەلى ءارى قاجىرلى ەڭبەگىنىڭ جەمىسى.
بۇگىنگى جەتكەن جەتىستىكتەرىمىزدى ساقتاۋ ءبىز ءۇشىن ماڭىزدى بولىپ قالا بەرمەك. سوندىقتان، ءتۇرلى جانرداعى قىزىقتى جوبالار مەن ولاردى ەفيرگە وڭتايلى ساتتە بەرۋ كەستەلەرى جاسالدى. دراما،كومەديا جانرىندا 6 سەريال دايىندالدى. سونىڭ ىشىندە 90 جىلداردىڭ توقىراۋ كەزەڭىندەگى كاسىپكەرلەردىڭ تىنىس-تىرشىلىگىن شىنايى بەينەلەنگەن ءفيلمدى اتاپ وتۋگە بولادى.تالاي جاندى اجالدان اراشالاعان ءورت سوندىرۋشىلەر تۋرالى،سونداي-اق براكونەرلەرمەن كۇرەستە قازا تاپقان ەرلان نۇرعالييەۆتىڭ عۇمىر جولى جاڭا سەريالعا ارقاۋ بولماق. بۇگىندە بۇل تەلەحيكايانىڭ ءتۇسىرىلىم جۇمىستارى باستالىپ كەتتى.
«پروفەسسيونال» دەگەن جوبامىزعا دا توقتالا كەتكەن ءجون. ونىڭ بىرەگەيلىگى سول، قازاقستاندىق تەليەۆيزيادا تۇڭعىش رەت وزدەرىنىڭ ەرەكشە داعدىلارىن كورسەتۋگە، سول ارقىلى «پروفەسسيونال» اتاعىنا يە بولۋعا مۇمكىندىك تۋعىزاتىن ەرەكشە جوبا. ەڭ باستىسى، مۇندا قاراپايىم جۇمىسشى كاسىپ يەلەرىنە بارىنشا جاسالعان مۇمكىندىك دەپ قابىلداۋعا بولادى. سونىمەن قاتار، ءبىز شەتەلدىك سەريالداردىڭ جانكۇيەرلەرىن ەڭ قىزىقتى جانە تانىمال تەلەنوۆەللالارمەن قۋانتۋدى جالعاستىرامىز.
– ينتەرنەت جۇيەلەر مەن digital-پلاتفورمالاردىڭ اقپارات تاراتۋدا ءداستۇرلى ب ا ق تى مەديا نارىقتان بىرتىندەپ ىعىستىرىپ كەلە جاتقانى جاسىرىن ەمەس. ءبىر قىزىعى بۇل ءۇردىس جىل وتە كەلە وزەكتى بولىپ كەلەدى. ءسىز باسقاراتىن ارنا بارىنشا ترەندتە بولۋ ءۇشىن قانداي پوزيسيانى ۇستانۋدا؟
– تەلەارنا قىزمەتى سەنىمدى اقپارات كوزى رەتىندە باسقا مەديا رەسۋرستارعا قاراعاندا ايتارلىقتاي ارتىقشىلىقتارعا يە. بىرىنشىدەن، تەلەديدار ينتەرنەت رەسۋرستارعا قاراعاندا اۋقىمدى حابار تاراتادى. ەكىنشىدەن، جوعارى ساپالى كونتەنتتى بىردە-بىر ينتەرنەت-ارنانىڭ بلوگەرلەرى جاساي المايدى. ولارداعى رەسۋرستىق شەكتەۋلەر اۋقىمدى ءتۇسىرىلىم، كۇردەلى جوبالار جاساۋعا كەدەرگى كەلتىرەدى. ۇشىنشىدەن، سەريال قاراپ، تەلە شوۋ تاماشالايتىن كورەرمەندەر ونداي ساپالى ونىمدەردى عالامتور جەلىسىنەن تابا المايدى. مىسالى، ءۇندى سەريالدارىنىڭ ءدال سول نۇسقا، سول دۋبلياجبەن ينتەرنەتتەن تاماشالاۋ مۇمكىن ەمەس.
اۋديتوريانىڭ بەلگىلى ءبىر بولىگى ينتەرنەت جەلىسىنەن اقپارات قارايتىنىن ەسكەرە وتىرىپ، ءبىزدىڭ ۇجىم ينتەرنەتتە بەلسەندى جۇمىس ىستەپ كەلەدى. الەۋمەتتىك جەلىنىڭ بارلىق تۇرلەرىندە تەلەگرامدا، فەيسبۋكتا، ينستاگرامدا، ۆكونتاكتىدە، سونداي-اق youtube ارناسىندا رەسمي اككاۋنتتارىمىز بار. مىسالى، توتەنشە جاعداي كەزىندە عانا ءبىزدىڭ تەلەگرام ارنامىزعا 50 مىڭنان استام ادام قوسىلدى. Instagram-دا 800 مىڭنان استام جازىلۋشىمىز بار. ال youtube ارناسى «التىن تۇيمەنى» الۋعا جاقىن.
الەۋمەتتىك جەلىلەرمەن جۇمىس ىستەۋ كەزىندە ءبىز بەلگىلى ءبىر پلاتفورمالاردىڭ ەرەكشەلىگىن باسشىلىققا الامىز. مىسالى، تەلەگرام ارناسىنىڭ جازىلۋشىلارى اقپاراتتى جەدەل العىسى كەلەدى. ال، ينستاگرام قولدانۋشىلارى وزدەرىنىڭ سۇيىكتى تەلە-شوۋلارى مەن جوبالارىنىڭ تۇساۋكەسەرلەرى تۋرالى اقپاراتقا كوبىرەك قىزىعادى. پىكىر-تالاستارعا قاتىسىپ، تالقىلاۋلار جاسايدى. ال، يۋتۋب كانالىمىزدا ەرەكشە جانرداعى جوبالارىمىز بەن سەريالدارىمىز بار. ولاردىڭ قارالىمدارى وتە جوعارى.
جاقىن كۇندەرى ەل تاريحىنا، تاۋەلسىز قازاقستاننىڭ دامۋ شەجىرەلەرىنە ارنالعان ەكىنشى يۋتۋب ارنامىز اشىلادى. سونىمەن، قازىرگى ارنامىزدىڭ باعىتى كوڭىل كوتەرەتىن جوبالار باعىتىندا بولسا، ەكىنشىسى، تاريح پەن ساياساتقا قىزىعۋشىلىق تانىتاتىن اۋديتوريا ءۇشىن قۇرىلادى. ارنا تاريحتاعى ەرەكشە وقيعالار مەن تۇلعالار، ەگەمەندىك العان تۇستان بۇگىنگە دەيىنگى قوعامدىق جانە ساياسي ءومىردىڭ بەينەكادرلارى، اۆتورلىق تانىمال باعدارلامالارمەن تولىقتىرىلادى. مەنىڭشە، مۇنداي رەسۋرستىڭ پايدا بولۋى اقىل-وي يەلەرى ءۇشىن ۇلكەن مۇمكىندىك بولماق.
مازمۇندى سۇقباتىڭىز ءۇشىن راحمەت. الداعى جوسپارلارىڭىز كورەرمەن تاراپىنان جۇزەگە اسىپ، ساپالى تەلەونىمدەرىڭىز كوپ بولسىن دەگەن سەنىمدى تىلەك بار. كەلە جاتقان – بۇقارالىق اقپارات قۇرالدارىنىڭ كۇنى كاسىبي مەرەكەڭىزبەن قۇتتىقتايمىن! سىزگە جانە ءسىز باسقارىپ وتىرعان ۇجىمعا ساتتىلىك، زور دەنساۋلىق جانە قاجىرلى ەڭبەك تىلەمىن!
پىكىر قالدىرۋ